Usem Läbe vomne Birkeboum

Mir Birkeböim bruche nid viu. Mir si gnüegsam, sparsam und i üs inne ruhend. Mir nä d Chraft us dr Töifi vom Chärn und usem Ruhepol vor Ärde. Mir schlö üsi Wurzle dert, wo d Ärde brach isch. 

 

Mir si auisamt sanft mitenang verbunge. Dr Übergang vom Ig zum Du isch fliessend. Jedes Läbewäse isch Teil vomne fliessende Strom - em Läbesstrom. Dört drinn chöit dir Mönsche euch i däm Mass entwickle, wiä dir euch das wünschet. Die einte heis gärn rasant u angeri nä sich gärn me Zyt. Sich ztroue und sich däm azvertroue isch dr Sinn, wo eues Läbe sött begleite. Wiä hiigäbigsvouer dir das machet, umso chraftvouer wird das Ganze.

 

I ghöre euch geng öppe chli umemuule, wenn dir bi üs im Birkewaud verbichömet. Dir steuet euch existenzielli Frage und fluechet übers Ecosystem. Äs isch a dr Zyt, das z erneuere, denn äs füehrt euch nid zur Queue vo euerer Wahrheit.

 

Mir Birkene si Weisheitslehrer und Weisheitslehrerinne. Mir si vouer Inspiratione für euch Mönsche. Ä Inspiration vo üs isch wiänä sanfti Berüehrig vo eurer Seu. Dür das wecke mir Bewusstsi. Mir mache eigentlich nüt angers, aus d Erinnerig i euch inne wachrüttle, wär dir  i euem Wäse würklich sit. Es chunnt de scho öppe vor, dass dir euch ä bitz verdüet und nech i dere grosse witte Wäut verlüüret. Äs git ou gar viu Idrück und Abdrück hiä und vieli Forme sich vom Wäsentliche abzlänke.

 

Aues, was du us dr Schönheit vo dim Wäse schöpfisch, biudet es eigets Ecosystem, Fäubsetzige lösts ab. Gniess diä Erliechterig u form us dim Läbe schöni Momänte und goudigi Erinnerige.

Kommentar schreiben

Kommentare: 1
  • #1

    Caroline Mösching (Freitag, 21 Mai 2021 11:16)

    Liebi Susanne
    Jede morge luege ig usem Fänschter zum Birkeboum, wo bi de Nachbare im Garte läbt und das git mir immer so e Ruhe u ou so es urvertroue! Dini Botschaft vom Birkeboum geit bi mir grad tief is Härz und berührt mi sehr!
    Danke viuviumau für das wärtvolle Gschänk!
    Für mi si die Botschafte wie Edusteine...unändlich wärtvoll.
    es Härzensgrüessli
    Caroline