Usem Läbe vomne Bireboum


Mä seit üs Bireböim nache, dass mir ä chli heikli sige. Das mag si, aber eigentlich wüsse mir eifach, was guet isch. Töif i üs inne schlummeret nämlich ä Weisheit, wo nid jede het. Du seisch dere Eigenart viellicht distanziert oder gar reserviert, für mi isch das eifach mini Wäsenstreui. Mir gloube nid aues, wo da verzeut wird uf dere Ärdchugele. Mir kenne d Absichte derhinger genau. Dir Mönsche sit Meister drin, euch säuber ztüsche.

 

Üs fingsch i dr Regu in Alleä. Mir si keni Einzugänger. Ou wenns dr Mönsch isch, wo üs i diä Reihefoug pflanzt, liebe mir diä Formation. Mir si sehr kommunikativ ungerenang. Bi üs weiss immer jede Bscheid. Das liegt a üsere guete Vernetzig. 

 

We mir Bireböim so uf eui Vernetzige luege, de gseh mir oft äs Chrüsimüsi a zämegwürflete Mönsche, izwängt i Rouene, wo gar nid em Wäse entspräche. Das cha nid funktioniere. Was geistriich isch, geit hiä verlore. U wenn i das ufs Gäud ummünze, de luegt ä jede für sich und sis Sunnestübli. Ä jede Bireboum hiä het glich viu Sunne und glich viu Platz u das macht s Zämesi so koschtbar. Äs isch kes Zwängele, Beniide und Kämpfe u ä kes Verdränge und enang übere Tisch abschrisse.. Werum ou? Jede het, was är brucht. Mir si zäme starch.. Das Fixativ macht euch uf d Duur unbeweglich, unfrei und unglücklich. 

 

Mini Weisheit für euch isch: Erchennit dr Wärt vom Mitenang i auer Liebi und Achtig. Jede Mönsch het Qualitäte i sich inne, wo einzigartig koschtbar si. Wenn ä jede das läbt, won är i sim Wäse o isch, wird vieles glinge und usem Glinge gedeiht o s Glück im Härz und das cha niemer choufe. Eues Läbe isch wiene goudigi Waag, wo dir drüber richtet.

Kommentar schreiben

Kommentare: 1
  • #1

    Tanja (Dienstag, 18 Februar 2020 08:55)

    Äs isch so ä wunderbari Gschicht wo ganz töif geit. Das us dr Sicht vomne Boum z schriebe isch faszinierend u geit miz iz Härz. Danke viu mau u i fröie mi sehr uf witeri lehrriechi Gschichte ♥️