Usem Läbe vomne Ahornboum

Hallo und guete Tag! Ig bi ä  Ahornboum. Mir Ahornböim si bekannt für üses fründliche Wäse. Fründlichkeit isch bi üs gross gschriebe. Ä guete Ustusch ungerenang macht s Läbe spannend. Weisch wiä häu das Ärdeläbe wär, wenn mir aui d Sunne im Härz würde la lüchte? Mir wäre ä Liechterchetti vouer Glücksmomänte.

 

Sich verbunge füehle isch ä ganz wichtige Teil vo euch Mönsche. Das macht euch us! Dir sit soziali Wäse! Dir bruchet enang. Wenn i ines Härz ine luege, wo diä inneri Sunne nid lüchtet, de gsehni dert ä Bärg vouer Enttüschige und ä Grabe vouer Misstroue. Wenn Tröim zergheie, cha das zwar unagnähm si, zeigt aber ou öppis uf. Dr Ungerschied zwüsche dä ächte Härzenströim, wo chraftvou si u dene, wo dir euch ibiudet, isch nid immer gäbig ersichtlich. Chumm, i zeige dir wies geit.   

Zwüsche dim Himu und dire Ärde gits viu z entdecke. Du bisch äs Wäse mitemene enorme Drang nach Wachstum. Dr Mönsch wott i aune Dinge über sich use wachse. Das isch ä guete Zug, es fragt sich eifach, wo dä häre füehrt. Diä wahre Tröim schlummere dert, wos geistriich isch. Diä füehre nämlich unmittubar zur Verwürklichung. Aui angere si fausch ufem Gleis, hei ke Substanz und blibe würkigslos. D Vision und d Illusion isch mängisch näch binenang. Wo d Illusion es Konstrukt usem Chopf isch, isch d Vision d Sunne i dim Härz.

 

Visione si Tröim. wo für aui tröimt wärde.

Kommentar schreiben

Kommentare: 1
  • #1

    Jeannette (Mittwoch, 19 Februar 2020 20:53)

    Eifach Ärdeschön❤️